يُعد البريوش من أشهر المخبوزات الفرنسية التي تتميز بقوامها الهش وطعمها الغني بالزبدة، وهو خيار مثالي للفطار أو مع الشاي، كما يمكن تقديمه سادة أو محشي بالشوكولاتة أو الجبن. ورغم شكله الاحترافي، إلا أن تحضيره في المنزل سهل جدًا إذا اتبعنا الخطوات الصحيحة. في هذه الوصفة، نقدم لكِ طريقة عمل بريوش ناجح وطري مثل الجاهز تمامًا.
مكونات البربوش:
• 3 أكواب دقيق
• 2 ملعقة كبيرة سكر
• 1 ملعقة كبيرة خميرة فورية
• ½ كوب لبن دافئ
• 3 بيضات
• 100 جرام زبدة طرية
• رشة ملح
• 1 ملعقة صغيرة فانيليا
للدهن:
• صفار بيضة + ملعقة لبن
طريقة تحضير البربوش
أولًا: تجهيز العجينة
في بولة كبيرة، اخلطي الدقيق مع السكر والخميرة والملح.
ضيفي اللبن الدافئ والبيض والفانيليا، وابدئي العجن.
بعد ما العجينة تتماسك، ضيفي الزبدة تدريجيًا مع الاستمرار في العجن لمدة 10 دقائق، لحد ما تبقى عجينة ناعمة وطرية.
ثانيًا: التخمير
غطي العجينة وسيبيها في مكان دافئ لمدة ساعة إلى ساعة ونصف، لحد ما يتضاعف حجمها.
ثالثًا: التشكيل
قسمي العجينة لكور صغيرة أو شكليها على هيئة رول أو ضفيرة حسب الرغبة.
رصيها في صينية مدهونة أو على ورق زبدة.
رابعًا: التخمير الثاني
سيبي العجينة بعد التشكيل ترتاح 30–45 دقيقة.
خامسًا: الخَبز
ادهني الوجه بخليط صفار البيض واللبن علشان تاخد لون ذهبي جميل.
دخليها فرن سخن على 180 درجة لمدة 20–25 دقيقة لحد ما تستوي وتاخد لون ذهبي.
نصائح لنجاح البريوش
• لازم العجن يكون كويس علشان يطلع هش
• الزبدة تكون طرية مش سايحة
• ما تكثريش دقيق أثناء العجن
• سيبيه يبرد شوية قبل التقديم
وبكده تحصلي على بريوش طري وخفيف زي الجاهز، تقدري تقدميه سادة أو مع مربى أو شوكولاتة حسب رغبتك
لمتابعة المزيد زروا صفحتنا على الفيس بوك 👇
https://www.facebook.com/share/1H51ao4C9e/
